Kaartverkoup Loup nao de Pómp

De veurverkoup veur ‘ t populaire vastelaoves-ivvenement “Loup nao de Pómp” sjtart op zóndaag 21 desember. Vanaaf 11.00 oer kinne leefhöbbers häör kaarte bemachtige veur deze unieke Remunjse vastelaovestradisie. De antreepries zal 9 euri zeen p.p. inklusief ein biejzunjer “gadget” es herinnering aan de LndP 2026.

Om alles ordentelike te laote verloupe, waere d’r vanaaf 9.30 oer volgnómmers oetgedeild. Hiemit waerdt verzekerd det koupers die vreug in de rie sjtaon ouch es eerste de kans kriege. De organisasie benaodrök det ein volgnómmer géín antreebewies is, mér inkel deent óm de verkoup eerlik en soepel te laote verloupe.

“Loup nao de Pómp” is inmiddels oetgegreujd toet ein vaste waerde in de Remunjse vastelaovend, mit ein pergram vol meziek en herkinbare Remunjse sfeer.
Mit dit jaor de meziek van en door De Mesjeus.

Kaarte zeen eder jaor rap oetverkóch, dus wilse d’r dit jaor weer bie zeen, dan mosse oppe tied bie Jills oppe neersjtraot zeen.