KUUL gewónne door Geweun Ingrid en Edwin
NEEL/REMUNJ – Op de eerste zóndaag van de èlfde maondj van dit jaor höbbe Geweun Ingrid en Edwin ouch de veerde edisie van KUUL op häöre naam gesjreve. Daomit is ’t häöre tweede winst op rie. Aad Gardemaedje Lian Schuman kalde ‘t pergram aanein.
Óm èlf menute euver half drie waas ’t den eindelik zowied: de aaftrap van de veerde edisie van KUUL, ’t Katers-Uul-Leedjessjpektakel. Mer leefs veerteen artieste sjtónge te trappele óm häör leedje aan ‘ne boemvolle zaal in De Sjter te laote heure. En ze kwame van euveral in Groot Remunj. Debutant Huub Rope van de Kaketoes beet ‘t sjpits aaf, leet de zaal sjoenkele en heure det d’r euver ’n gooj zangsjtum besjik, waat väöl goods veur de rès van de middaag belaofde. Katermaedje Nina Bongaarts en ‘Sjpoeskater’ Thei van Cruchten sjoenkelde mit ós wiejer, terwiel ónger meer Janny Schaefer en Mick Leijendeckers de zaal good mit krege mit häör up-tempo leedjes. In de pauze zorgde de Prinsekepel van de Katers veur de meziek, zo kós ’t pebliek aeve op aom kómme.
Daonao waas ’t drek knalle geblaoze mit ’t SJNAPS, ofwaal de Aad Prinse oet Neel. ’t Pergram nao de pauze waerde wiejer gekinmerk door de deilname van Rob Verstappen, hofleveranseer van de prinsekruutse veur de Sjtadsprinse van D’n Uul, en Aad Sjtadsjeugprins 2020 Cas I Linnartz mit zien mam Petra es ’t duo Get Angers.
Óngerwieles det ’t pebliek häör stjum kós oetbringe en de jury in beraod ging, brach de Prinsekepel van D’n Uul sjtumming.
In de kattegorie ‘covers’ ware d’r helaas gein prieze te verdeile, ómdet ’t reglement aanguf det det pas gebeurt bie ’n minimaal aantal covers van drie en ’t d’r dit jaor twee ware. In de kattegorie ‘orzjenele leedjes’ waas ‘t ‘ne sjpannende oetsjlaag, want volges de jury zote de nómmers twee en drie héél doon bie-ein. Op de derde plaats is oeteindelik Get Angers geëindig en de tweede plaats waas weggelag veur de groep Próngelök mit häör leedje ’t Viefde sezoen. En taege häör eige verwachtinge in ginge Geweun Ingrid en Edwin d’r wederóm mit de hoofpries vandoor. Zie traeje volgende waek woonsdaag op de 11devande11de óm 14:00 oer op en mit de vastelaovend op de Sjtasiefestasie in Remunj en de Vastelaoves Villaasj in Neel.
Van herte perfisiat allemaol en veer zeen ós volgend jaor weer in Remunj veur ’t eerste lustrum van KUUL!
Gesjreve door Uule-versjlaaggaever Luuk Hendriks
