Sjeemprinse 2021
Sjeemprinse Hein 41 en Lei 41:
‘Haaj mich neet veur ’t lepke’
Gebreurs Timmermans eindelik veurop in de Vastelaovend!
De Sjeemprins(e) kin(ne) eindelik aan de sjlaag
Veer sjtèlle aan uch veur; de Sjeemprins(e) van D’n Uul 2021!
Al jaore wachte ze gedöldig om häör ról es Sjeemprins oet te kinne drage nao de Remunjse Vastelaovesvierders. In deze turbulente tied sjpringe zie op ’t paerd.
’t Wachte haet zich geloond…
Here, wiej sjrief geer uch?
De naam van ‘ne Sjeemprins is pas intersant es d’r in aksie mót kómme en zeker de naam van de reserf Sjeemprins, want dan zól dae, nao ’t oetvalle van de echte Prins en Sjeemprins d’n eerste, pas hove in te valle. (En zeker neet óm te valle…) Jao mer dórslöstige hoogheje, geer gaot de ról ech invölle. Dus wille veer es Vastelaovesvierders waal weite wie veer uch mótte neume es veer ‘ne breef wille sjrieve, of de flesse drank wille gaeve.
Nou alleij dan, veer zeen al zo lang eder jaor Prins det veer noe Lei 41 en Hein 41 zeen.
Waat doot geer in ’t dageliks laeve?
‘ne Sjeemprins haet ‘n trökgetrókke laeve, neet väöl oetgaon, sóndaags nao de kirk, wanjele, hel wirke aan de kóndisie, gezóndj laeve en saoves ‘n good book mit ‘n kretje beer.
Geer zeet mit zien tweeje. Wie kump det?
Det kump ómdet veer breurs zeen en ‘n klein geheim dan… Veer höbbe nog ‘n broor, mer wo dae is, wèt nemes…
Ónger wèlke naam gaot geer de ker trèkke?
De sjpreuk van de Sjeemprins 2021 is; “Haaj mich neet veur ’t lepke”. Mesjien waal toepasselik dit jaor.
Mer, mer… Is d’r waal get te trèkke?
D’r is kómmend jaor weinig te trèkke mer det kint ós nieks verrèkke…
Geer zeet al väöle jaore Sjeemprins(e) van D’n Uul, wie lang al?
De ról van Sjeemprins(e) vervölle veer vanaaf 4×11 D’n Uul. Jos Perey waar jubeleijemprins
en veur ‘t eers vónj D’n Uul ‘t veur ‘n jubeleijemjaor belangriek det ’r (veur ‘t geval det…) ‘ne
Sjeemprins ‘stand by’ mós zeen. Vanzelfsjpraekend ónopvallend, mit ‘t rokkestuum gesjtreke in de kas en de opgevreve laksjoon zote veer toes klaor mit ‘ne pieper, want de mobiele tillefoon waar d’r toen nog neet…
Woróm wis nemes dao get van?
Höbs se oojt gewete det Victor Adams es Bacchus bie ‘t Bacchusdrieve van de verdrinkingsdood is gered door de Sjeemprins? Nae..? Det dachte veer al… En dao wis ouch nemes get van en det wille veer gaer zo laote.
Wie is ’t in godsnaam gekómme det geer de Sjeemprins(e) van D’n Uul zeet gewaore?
Veer zeen oojt gevraog door de vreugere Goevernäör van Limburg, de Heer Sjeng Kremers, ónger de jaorlikse ‘Sjeemprins(e) lunsj’ op ‘t Goevernement in Mesjtreech. ‘Good looking boys’, sjportieve tiepes, geveul veur humor, ónopvallend, besjeije en väöl beer kinne verdrage… Neet óm ós get te meine mer veer hadde ouch bès Prins van D’n Uul kinne waere. Mer ja, Sjeemprins verdeent baeter en opa zag altied : “Doot mer geweun, dan duis se gek genóg”.
Dus de Prinsefotoos zeen gemaak door de ‘Kits’. Wie ging det?
Op pekskesaovend had Gerritje Vogel zeliger ‘t prinsepak van d’n Uul gesjtaole veur ’n sjoon ekt. Veer mit Gerrit nao Rob Kitslaar, dae net mit zien gezin aan de sinterklaosviering wól beginne. Veer höbbe dae aovend orzjenele Prinsefoto’s gemaak bie Rob in de Neersjtraot. ‘n Superekt waar det!
En det Prinsepak dan? Det hóng toch örges in ‘ne kas..?!
D’n Uul had ‘n saort klubhoes in de Veursjtad, dao hóng det pak en Gerritje had de sjleutel…
Door gans Remunj ginge geruchte det geer de Prins zólt gaon waere, d’r ware miense die wiste ’t heel zeker… En toen sjting geer neet op de Nach wo geer mósde sjtaon. Wo waart geer?
Veer ware neet wied van uch aaf in ‘ne geheime kas in de Oranjerie. In de Salle de Fête waert eder jaor ónger de bühne eine floertegel losgemaak Es d’r get fout geit, kinne veer vanoet de geheime Prinsekas ónger de floer door nao ’t podium, zónger det geer det merk. Vanaaf 3e kersdaag, dus zèk mer 10 daag veur de Nach van de Nuje Prins, zeen veer al op lokasie in de Oranjerie… En eder jaor is ‘t nog good gegaon en kósde veer oos ról es Sjeemprins geheim haje.
Höb geer de Prinse nog raod gegaeve, en zo jao, wèlke raod?
Veer höbbe nog noojt kóntak mit de Prins gehad, waal dinke veer waal ins es veer in de coulissen klaor sjtaon: “Det zólle veer angers höbbe gedaon!” (Zónger name te neume…)
Waat zagte ze toes det geer Sjeemprins ging waere?
Toes höbbe veer det noojt vertèld mer veer vertèlle toes zowiezo neet alles… En boete det… Doe hoofs pas get te vertèlle es se in aksie mós kómme, eerder neet.
Zón Sjeemprinsmaedje haet ’t al die jaore neet mekkelik gehad óm mer te blieve zjwiege. En die van uch vierde ouch nog Vastelaovend door kappes en tebak… Wie vónje zie det wachte, wachte en nog ‘ns wachte..?
Op det antjwaord zólt geer nog jaore mótte wachte en daoróm kinne veer d’r mer baeter euver zjwiege…
De Prinsefoto haet dus noojt op de sjouw gesjtaon. Det mót toch edere keer es se dao nao kieks ‘n laeg geveul gaeve… Wie geis se dao mit óm?
De Prinsefoto sjteit geweun toes altied op de sjouw, allein es ’r bezeuk kump, berge veer die foto op in de de Sjeemprinsekluus, dao ligke ouch ‘t Prinsekruuts, de witte hase en de berdels.
Geer höb väöl rólle in de Vastelaovend vervölt. Zo wie adjudant en muziekant in de Prinsekepel. Wilt geer ós die rólle besjrieve?
Dao wille veer nieks euver zègke, want det hoof wiejer nemes te weite en det zal oos rippetasie es Sjeemprins (e) gein good doon.
Geer zeet gebaore oet ‘n sjprookjeshuwelik, eur vader waar ‘de Heks’ en is ‘ne Prins gewaes. Wie is det óm op te greuje mit ‘n heks in hoes dae aeve later weer es Prins mit möts op, door ’t hoes rent?
Hae waar, zo wie edere vader, oos grote veurbeeld en veer zeen greujts op ‘t feit det hae geine Sjeemprins neudig had, want dan hadde veer Sjeemjeugprins(e) mótte zeen.
Vierde eur moder ouch Vastelaovend?
Zie (Jess) haet altied ‘n grote ról gesjpeeld. Same mit vader nao ’t Verkesbal op de achtergróndj. Zie goof d’r neet väöl óm; “Veer höbbe ’t van oos moder, die sjting ouch altied in de sjeem” Es ’t kump dan kump ’t, waat betruf in de belangsjtèlling sjtaon. Ze haet lang geperbeerd oos vader en zien adjudante en later ós in ‘t gareel te haje. Veer jónges toes waar bès ‘n opgaaf. Oos vader höbbe veer altied ‘d’n oudste’ geneump.
Aeve trök nao eur funksie es Sjeemprins(e). Ónger wèlk motto gaot geer de Vastelaovend in?
Zo wie gezag: “Haaj mich neet veur ’t lepke”
Kint geer oetligke waat det inhilt?
Kiek mer ‘ns róndjóm dich haer es se boodsjappe geis doon…
D’r zeen gein nuuj sjtasiefoto’s gemaak, woróm neet?
De nuuj sjtasiefoto’s zeen gemaak en ligke in de Sjeemprinsekluus. Ouch de fotograaf zit in’t kómplot. Waem det is blief geheim, maar hae vervalsde vreuger pasfotoos…
Wie gaot geer de Sjeemprins(e) oetdrage?
Dit is gein gooj vraog. Sjeemprins bös ze in sjtilte en aafwezigheid, ‘n laege bühne, ‘ne laege zaal, laeg glazer… Dao mós se taege kinne mer dao waers se es Sjeemprins waal op geselekteerd… Miense mit karakter dus… Wie veer…
Zeen d’r adjudante en zo jao, waem zeen det en woróm dees men/vrouwluuj?
D’r zeen gein Sjeemadjudante want die mótte veer euvernaeme van de Prins (dae oetvelt…). Waal mótte veer veur de vrouw van de Prins (dae oetvelt…) zorge, mer altied de witte hase aanhaje… Veer blieve in sjtiel net zo wie ‘Geheimaggent James (van de Boere)Bóndj 007’.
In de tied destoe Sjeemprins waars, waerdes doe Prins Hein de 1e van de Waterratte in Ool. Sjeemprins en Echte Prins! Sjtèl destoe oet de sjeem hads mótte sjtappe…
In 1995 waar d’r ‘ne ‘mol’ bie D’n Uul dae, es ein van de weinige op de heugte waar van ’t besjtaon van de Sjeemprins. Wie wis dae det?? De betreffende persoon waar outomóntäör en lid van de Prinsekepel in 1995. Vórs Naad zeliger wis ouch van ’t besjtaon van ‘ne Sjeemprins aaf. Naad brach ziene outo nao de geraasj veur ‘n óngerhaldsbeurt, wo ‘de mol’ wirkde. In dae outo had se destieds nog kassettebendjes, en wie ‘de mol’ de outo sjtartde, heurde hae det op ’t kassettebendje ‘n geheime vergadering mit de Sjeemprinse waar opgenaome. Op det moment ware de rape gaar! Es aafleijingsmenäöver bön ich toen Prins van de Waterratte gewaore, want die trokke toen nog mer 3x per sezoen oet. Mer Sjeemprins sjting gelökkig stand-by. ’t is noojt wiejer oetgeleek en det mós ouch zo blieve.
Net wie dien broor bös se al adjudant gewaes bie D’n Uul. Adjudant, det is ‘ne jóngesdruim, en dan toch Sjeemprins blieve al die jaore? Wie höbs se det vaerdig gekrege?
Wie ich adjudant waerde in 1994 waas ich al Sjeemprins. De prins (wovan veer de naam geheim mótte haje) haet ’t noojt geweite. Ich höb d’r alles aan gedaon: Dansles gehad, laksjoon gepas én ingeloupe veur ’t geval det… ‘ne Körzes gevolg in ’t oetreike van hoesordes, en alle name en maote van de Damesgarde oet de kop lere en oetein kinne haje. Det heurt allemaol bie ’t vak en noe kump ‘t: ’t betaalt ouch nog good! Mer doe dinks dan waal ‘ns es adjudant: ‘dao had ich ouch kinne sjtaon’. Eerlik is eerlik, mer ich dink dan mer zo: Prins bös se mer aeve, Sjeemprins dien ganse laeve!
Normaal waert geer nao de Vastelaovend opgenaome bie de Aadprinseklub. Die zólle waal ’t ein en anger aan te merke höbbe. Wie gaot geer die ‘hoogheje’ toesjpraeke?
Jao, det is ‘n gooj vraog… Mer de vraog is of die ós oojt zólle oetneudege..? Ouch zón Aad Prinse gala zól bès ‘ns leuk zeen, want veerhöbbe toch veur heel väöl hoogwaerdigheidsbekleijers binne D’n Uul klaor gesjtaon zónger det zie ‘t wiste. Mer ja, es se Sjeemprins waers en bliefs, kumps se netuurlik ouch neet op zónne aovend…
’t Is toch al weer ‘n tiedje geleje det geer Keuninklik zeet gewaore, waar det ‘n verrassing?
Nou, det waar netuurlik gaaroet gein verrassing. Sins veer Sjeemprins zeen loupe veer al mit achter de Prins van Soesdijk, dae vlaegel bedoele veer dan. Zèk mer Ome Bernhard… Netuurlik sjtónge veer altied achteraan op ’t balkoen in de sjeem van dae sjtoute jóng óndanks zien laeftied. Nao ’t diffielee zote veer ós biejein in de achterkamer en roukde dao dan ‘ne Havana mit ‘n glaeske Asbach Uralt. Van de Uule CD drejde veer dan ‘Einzelgänger’, dan lachde Bernard zich kepot, “jawohl, jawohl” zeij d’r dan “dat ist wat ich mein, die sjpeiker op meine kopf gesjlage”. Veer vertèlde dan euver de Vastelaovend in Remunj en waat oos Prinse allemaol oethaole en dan begós Bernhard euver zien gemaskerde bals op Windsor Castle en in Monaco. Nae, neet vraemp det veer opgenaome zeen in de Keuninklike femielie.
Noe det geer eindelik oet de sjeem zeet gesjtap, wie mót ’t noe wiejer? Of blief geer toet ‘n volgende óngelökkige gelaegeheid es Sjeemprins door regere?
Veer zeen gevraog veur ‘t laeve, meer kinne veer op dit moment neet zègke…
‘T ZAL GANS ANGERS WAERE KÓMMENDE VASTELAOVEND. BLIEF GEZÓNDJ, VEER SJTAON KLAOR VEUR UCH ZO WIE EDER JAOR!
De Sjeemprinse 2021 van Sjtadsvastelaovesvereniging D’n Uul Remunj, ónger ‘t motto
‘Haaj mich neet veur ’t lepke’
Alaaf en blief gezóndj allemaol !
Math I de Ponti
