Sjtasiefestasie Remunj weer vriej toegankelik: ticketsysteem verdwient
Stichting Sjtasiefestasie Remunj sjtapt aaf van ‘t ticketsysteem en maakt de waeg vriej veur eine trökkeer nao ein volledig vriej toegankelik ivvenement. In good euverlik mit de gemeinte Remunj en de betrokke veiligheidspartners wird de entree veur de Sjtasiefestasie opnuuj graties en zónger ticket.
Daomit keert ’t populaire Vastelaoves-ivvenement trök nao haor belangriekste oetgangspuntj: ein fees veur idderein. In 2024 zoog de sjtichting zich genoodzaak ein ticketsysteem in te veure om de veiligheid op ’t ivvenement te waarborge. Deze maotregel waas effectief, maar sjting haoks op de wins om ein leegrempelig ivvenement en toegankelik volksfees te organisere.
De aafgelaupe twee jaor is daorom intensief gewirk aan nuuje veiligheidsmaotregele en technische innovasies womit bezeukerssjtruime en aantalle realtime kinne waere gemonitord. Door dees ontwikkelinge kinne veer es organisasie noe opnuuj keeze veur vrieje toegang toet oos ivvenement.
Tegeliekertied blieft veiligheid onverminjerd prioriteit. De verdere proffesjionalisering van de organisasie en de samenwerking mit de gemeinte en veiligheidspartners make deze sjtap meugelik.
Vol is vol
’T vervalle van ’t ticketsysteem geldj veur de Sjtasiefestsie op Vastelaoveszaoterdaag. De Sjolefestasie op Vastelaovesvriejdaag blief, net es veurgaonde jaore, gratis toegankelik. Veur beide ivvenementen geldt waal ’t principe ‘vol is vol’. Wanneer de maximale capaciteit van ’t plein is bereikt, kint de toegank tiedelik waere aafgesjlaote. Bezeukers waere hiej tiedig euver geinformeerd via de website en socialmediakanalen van de organisasie.
Trök nao de essensie van Vastelaovend
Mit dees keus keert de sjtichting terök nao de essensie van ’t Limburgse volksfees: same viere, zónger drempels. Idderein mot kinne mitdoon, ongeach leaftied of achtergrondj. Det is wo Vastelaovend om dreijt. De organisasie kiekt d’r dan ouch nao oet om in fibberwarie weer doezjende bezeukers te verwilkómme op ’t Sjtasieplein in Remunj
