Zdh Jules I Sjtadsprins van Remunj, prins van D’n Uul
Jules I Breuer Sjtadsprins van Remunj.
Mit 23 jaor jôngste Prins Uulehistorie, Maurice I (1989) Zwanenberg is nao 37 jaor aafgelos.
Tiejes de ‘Nach van de Nuje Sjtadsprins’, is op zaoterdaag 3 jannewari Jules Breuer es Sjtadsprins van Remunj en Prins van Sjtadsvastelaovesvereniging D’n Uul geprizzenteerd. Veur de 3e keer – dus inmiddels tradisie – in ein prachtig aangekleide theaterzaal. Ónger ‘t nuje motto ‘Hert veur Vastelaovend!’ waerde de Sjtadsprins ten tonele gebrach. Jules is rónd 20:41 oer door Vórs Dirk I bekind gemaak op ‘t inj van ein ekt wobie de Aad Sjtadsprinse van D’n Uul ein rol hadde bie ‘t nao veure bringe van de nuje Sjtadsprins. Vervolges is Jules mit alle biebeheurende regalia door Vórs Dirk I toet 81e Sjtadsprins van Remunj en Prins van D’n Uul geïnstalleerd. Jules I los nao 37 jaor veurmalig Sjtadprins Maurice I (1989) Zwanenberg aaf es jóngste Sjtadprins in de Uulehistorie. Ziene Dorslöstige Hoogheid Sjtadsprins Jules I ‘is gebaore’.
Sjtadsprins Jules I is op 1 oktober 2002 gebaore en sjtamt oet ein ‘ech Remunjs gezin’ wo-in hae opgreude mit broor Luca, ein van zien adjudanten. Momenteel in de leste fase van zien sjtudie rechtsgeleerdheid, wirk de kersverse Sjtadsprins bie Albert Heijn Heerschap aan de Godsweerdersingel. Ziene aggenda zit echter nog neet vól want Jules zei vólmondig jao op de vraog of hae naeve de sjtudie rechtsgeleerdheid, euver Remunj wilde regere es Sjtadsprins. Hae is 3 jaor same mit zien vriendin Sara Nusselder die geneeskunde sjtudeert in Nijmegen.
Biezunjer is dat Jules I in 2013 es adjudant aktief waas, namelike bie toenmalig Sjtadsjeugprins Damiaan I Bertrams.
Jules I regeert ónger ziene liefsjpreuk ‘Eine jónge Uul haet de vaere rech op ‘t köpke!‘ en leut zich biesjtaon door drie adjudante; Rutger Geurtz, Damiaan Bertrams en Luca Breuer. Behalve de eerder beneumde familiaire bandj mit broor Luca en ‘t biezunjere Uuleverleje same mit Damiaan, haet ouch adjudant Rutger ein Uuleverleje.
Rutger waas in 2014 adjudant van toenmalig Sjtadsjeugprins Sem I van Atteveld en is de zoon van veurmalig 7×11 jubeleijem Sjtadsprins Roger I (2014) Geurtz.
